TITUS
Slovo o polku Igoreve (critical ed.)
Part No. 24
Previous part

Chapter: 24 
Chapter 24 Link to igorsh


Paragraph: 153    Вьрже Вьсеславъ жрѣбии <жеребии> о дѣвицю </дѣльницю?> себѣ <собѣ> любу.

Paragraph: 154    Тъи клюками подъпьръ ся о копли, скочи къ граду <городу> Кыеву и дотьче ся стружиемь злата <золота> стола Кыевьскаго.

Paragraph: 155    Скочи отаи лютымь звѣрьмь въ полуночи из Бѣла-града <-города>: обѣси ся сини мьглѣ.

Paragraph: 156    Утьрже вазни съ три кусы, - отвори врата <ворота> Нову-граду <-городу>, рашибе <рошибе> славу Ярославу.

Paragraph: 157    Скочи вълкъмь до Немигы, - съду токъ: на Немизѣ снопы стелють головами, молотять цѣпы харалужьными; на тоцѣ животъ кладуть, вѣють душю отъ тѣла.

Paragraph: 158    Немизѣ кръвави брѣзи <берези> не бологъмь бяхуть посѣяни, - посѣяни костьми Русьскыхъ сыновъ.

Paragraph: 159    Вьсеславъ кънязь судяше, кънязьмь грады <городы> рядяше, а самъ въ ночь вълкъмь рискаше: ис Кыева дорискаше до куръ Тъмутороканя, великому Хърсови вълкъмь путь прѣрискаше <пере->.

Paragraph: 160    Тому въ Полотьскѣ позвонишя заутрьнюю рано у святыѣ Софиѣ въ колоколы, а онъ въ Кыевѣ звонъ слышя.

Paragraph: 161    Аще <аче> и вѣщя душя въ друзѣ тѣлѣ, нъ чясто бѣдьнѣ страдаше.

Paragraph: 162    Тому вѣщии Боянъ и пьрвое припѣвъку съмысльныи рече:

Paragraph: 163    "Ни хытру, ни горазду, ни пътичю гърласту Суда Божия не минути."



Next part


This text is part of the TITUS edition of Slovo o polku Igoreve (critical ed.).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.