TITUS
Slovo o polku Igoreve (critical ed.)
Part No. 13
Previous part

Chapter: 13 
Chapter 13 Link to igorsh


Paragraph: 79    О! далече заиде соколъ, пътичь бия, - къ морю!

Paragraph: 80    А Игорева храброго <хороброго> пълку не крѣсити.

Paragraph: 81    За нимь кликну карьна, и желя поскочи по Русьскои земли.

Paragraph: 82    Смагу мычючѣ въ пламянѣ розѣ, въсплакашя ся жены Русьскыѣ рькучѣ:

Paragraph: 83    "Уже намъ своихъ милыхъ ладъ ни мыслию съмыслити, ни думою съдумати, ни очима съглядати, злата <золота> и сребра <серебра> ни мало того потрепати."

Paragraph: 84    А въстона бо, братие, Кыевъ тугою, а Чьрниговъ напастьми.

Paragraph: 85    Тъска разлия <роз-> ся по Русьскои земли; печяль жирьна вътече срѣдѣ <середѣ> землѣ Русьскыѣ.

Paragraph: 86    А кънязи сами на себе <*ся> крамолу <коромолу> коваху.

Paragraph: 87    А погании, сами побѣдами нарищюще <-че> на Русьскую землю, емляху дань по бѣлѣ отъ двора.

Paragraph: 88    Тая <*та> бо дъва храбрая <хоробрая> Святославичя, Игорь и Вьсеволодъ, уже дъжю убудиста, которую то бяше усъпилъ отьць ихъ <*ею> Святославъ грозьныи великыи Кыевьскыи - грозою бяшеть притрепеталъ </притрепетала?>.

Paragraph: 89    Своими сильными пълкы и харалужьными мечи наступи на землю Половьчьскую, притъпъта хълмы и яругы, възмути рѣкы и озера, исуши потокы и болота, а поганого Кобяка из луку моря, отъ желѣзныхъ великыхъ пълковъ Половьчьскыхъ яко вихрь вытърже: и паде ся Кобякъ въ градѣ Кыевѣ, въ гридьници Святославли.

Paragraph: 90    Ту Нѣмьци и Венедици, ту Грьци и Морава поють славу Святославлю, кають кънязя Игоря, иже погрузи жиръ въ дънѣ Каялы: рѣкы Половьчьскыѣ Русьскаго злата <золота> насыпавъшя </насыпаше>.

Paragraph: 91    Ту Игорь кънязь высѣде и - седьла злата <золота> а въ седьло кощиево.

Paragraph: 92    Унышя бо градомъ <городомъ> забрала <заборола>, а веселие пониче.



Next part


This text is part of the TITUS edition of Slovo o polku Igoreve (critical ed.).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.