TITUS
Denkard Book 5
Part No. 19
Previous part

Chapter: 19  
Paragraph: 1     andar paristišn kū

Paragraph: 2     bowandag-menīdārīhā ud guftārīhā ud warzīdārīhā tuwān-sāmān ān ī xwābar spannāg mēnōg pad dahišn āfrīdārīh ud abārīg ān stāyišn ud hāmist paristišn [ī] dahišnān +rāy xwēš.

Paragraph: 3     ud andar ān ī dahišnān-iz [ī] xwēš hamāg padiš bowandag-spāsīhā pad ham-stāyišnīh ud ham-paristišnīh.

Paragraph: 4     ud fradom šnūmanīh ī andar ēzišnīhā namāz ān ī padīrag +xwaršēd fradom ō dādār ohrmazd ud pas dahišnān-iš se bār andar rōz pad hu-waxš ud nēm-rōz ud hu-frašmō-dād čiyōn menišnīgīhā-tar ud hu-paristagīhā-tar ud ān ī padīrag māh ud stāragān ud ātaxš ud hāmist rōšnīgān <ī> padīrag māh ud stāragān ud ātaxš ud hāmist rōšnīgān <ī> +čiyōnīh ud dōgān az abestāg paydāg.

Paragraph: 5     ud andar sāl pas šaš hangām ī gāhānbār har ǰār-ē panǰ rōz ēzišn ī pad šnūman ī ratwobrazat ud abārīg warzišn ī andar gāhānbār niyābag.

Paragraph: 6     ud dah rōz paristišnīh andar frawardīgān niyābag ud rōzgārīg ān ī pad nāmčišt-tar andar sāl dwāzdah māh ud har māh sīh rōz ud andar rōz panǰ gāh.

Page of ed.: 62 
Paragraph: 7     ud hamē pēš ud pas az xwarišn paristišn ud abārīg paristišnīhā +čiyōnīh dōgān az abestāg paydāg

Paragraph: 8     ud ān ī dahišnān bowandag-menišnīhā ud rāstīhā ǰud ǰud pad xwēš +čiyōnīh abdīhā ud wuzurgīhā stāyīdan azbāyīdan ud wuzurg-dahišnīh ud abd-dahišnīh ī dādār padiš guftan ud ham-dahišnīh ī-šān amā dōšārmīhā paydāgēnīdan awišān padīrag niyāyišn ud čand šāyēd pēš niyāyišn būd<an>.

Paragraph: 9     ōh-iz abēzag rōšnān ī wēnišnīg ud ān ī ham-rasišnīg čiyōn mardōm ud gōspand ud ātaxš ud ayōšust ud zamīg ud āb ud urwar abāg stāyišn ud paristišn ī čiyōn guft pahrēz-iz ud parwarišn dādīhā ud ēwēnīhā čiyōn

Paragraph: 10     abar mardōm anāgīh nē ud nēkīh čand šāyēd kardan ud mihr ud dōšārm ī ham-dahišnīh ud ham-čihragīh ud ham-dēsīh ud abārīg ham-paywandīh ōstīgān dāštan abēr-tar ān čahār ham-paywandīh ī pad xwēšīh ud ērmānīh ud wālunīh ud dēn guft ēstēd.

Paragraph: 11     az ōy ī abar-tom dahībed ud tā-z ān ī abāzīg-tom mardōm [ud] ēč weh dahišn tar nē ud har kas čiš bowandag menīdan.

Paragraph: 12     ud ān ōwōn menīdārīh ō [menīdārīh ī] xwābar dādār pad ān ōwōn abd-dahišnīh abzūdan ušān pad kardārīh spās dāštan ud pad stāyišn ud niyāyišn ud āfrīn xwaxšēnīdan ud hangirdīg ān ī pad xwēš nē nēk pad ane-zān nē kardan ud abārīg ī čiyōn andar frārōn-dādīh paydāg nāmčišt xwārīh ēč ēwēnag nē-z menīdan ud pad zanišn ud apparišn ud wiyābēnēnīdārīh ō dādestānōmandān nē šud<an> ud mihr nē druxtan ud spās nē framōšīdan ud penīh ud abārīg dēwān-dādīh abar nē burdan ud a-kēnīh xwābarīh ī abar har weh dahišnān abēr-tar abar mardōmān <ī> xwēš hāwand-nigerišnīhā dāštan.

Page of ed.: 64 
Paragraph: 13     ud gōspand andar abē-bīmīh ud pānagīh ud āb ud wāstar ud abārīg paristišn ēwēnīhā dāštan ud čiyōn kuštan pad meh-dādestānīh ī meh-dānān [čiyōn] mardōm ud meh-zanišnīh ī dēwān čiyōn ātaxš ī wahrām a-wizīrišnīgīhā nihād ēstēd a-paymān ud a-dādīhā nē kušt<an>.

Paragraph: 14     ud az an-arzānīgān ud a-paymān-ǰōyišnīh ud wanygarīh ud duzān ud gurgān ud suy ud tišn ud sarmāg ud garmāg ud abārīg petyārag ud zanišn pahrēxtan ud kār ud ranǰ ud bār ī garān <ud> a-dādīhā abar nišast<an> ī wattarān nē framūdan ud a-dādīhā sālār nē hištan ud aboxšūdārīhā ud ēwēnīhā dāštan.

Paragraph: 15     ud ātaxš ǰud-iz az ān ī čiyōn abārīg rōšnān padisāy-iz ī-š bahrīh ī-š gētīgān stī az āb ud wād hammis ud mādayān bun mādag ī-š ēdarīg gyān-dārīh ud parwarišn.

Paragraph: 16     abāg pahrēz ī az zad<an> ud ōzad<an> ud nasā az sīh gām ī se pāy ud daštān az pānzdah gām ud wēnišn ud gand az se gām ud abārīg hixr <ī> az tan ud az-iz ādurastar ud sraxt ud tābišn nazdīkīh ud har rēmanīh ud a-dādīh.

Paragraph: 17     u-š abāz dāštan ī brāh ī xwaršēd ud suy ud nizārīh ud sarmāg ud garmāg ī a-paymān ud ranǰ ud kār ud an-ēwēn paristišn ī an-arzānīgān.

Paragraph: 18     ud hubarišnīh ud ayār-barišnīh ud nēk-barišnīh ud abar barišnīh ī ān ī hušk ud pāk ud passazag ēsm ud bōy ud hu-pānagīh ud dādīhā sālārīh ud ka nērōgīg šāyēd ud zōhr <ud> abārīg ī čiyōn pōryōtkēšān kardag.

Paragraph: 19     ayōšust pāk ud pahrēxtag pad kār ud payrāyag xūb dāštan.

Paragraph: 20     ud tēxīhā pad nāmčišt ud abārīg ayōšust az dād<an> ī ō an-ērān ud a-dādestān-kunišnān.

Page of ed.: 66 
Paragraph: 21     dāštan ī andar nigānīh ud agārīh ud zang ud a-brāzyāgīh ud an-arzānīgān padiš brāzēnīdārīh ud nigārīh <ī> wattarān pahrēxtan ud ēwēnīhā dāštan.

Paragraph: 22     ud zamīg az nasā-nigānīh ud dēwān ud xrafstarān ud abārīg wattarān mānišnīh ud dārišnīh ud bar aziš ǰōyišnīh ud abar dwārišnīh ud čand šāyēd abar nigerišnīh ud a-warzīd ud abar ud a-mānišn hilišnīh ud abārīg a-dādīh pahrēxtan.

Paragraph: 23     ud mardōmōmand ud gōspandōmand ud āb ur urwar waxšišnīh ud weh dahišnān padiš winārišnīh ud hu-zīwišnīh ud frārōnīh rāyēnīdārīh dāštan.

Paragraph: 24     ud āb ǰud-iz az ān ī čiyōn abārīg rōšnān pad ān ī abāg ātaxš ham čim pahrēz ud paristišn čiyōn ātaxš ud pad hangirdīg az har rēmanīh ud gandīšn šōyišn ud abārīg ayārīh ud paristišn ī an-arzānīgān pahrēxtan ud pāk ud dādīhā ud hušnūd dāštan.

Paragraph: 25     ud urwar pad ān ī abāg zamīg ham čim *ǰomā zamīg ud pad ān ī abāg āb ham čim *ǰomā āb ud pad ān ī abāg ātaxš ham čim *ǰomā ātaxš ud pad ān ī mayānag mayānagīhā pahrēz ud dārišn ud parwarišn ud stāyišn ud abārīg šnāyišn čiyōn-iš niyābag ǰud ǰud čiyōn-šān ōšmurišn dēn gōwēd.

Paragraph: 26     ēdōn-iz ēk ēk a-wēnišnīg mēnōgān yazdān az xwār-dārišnīh ud nikōhīdārīh ud abārīg tar-menišnīh pahrēxtan ud pad sahīgīh ud abdīh ud kardārīh ud spās ī-šān ast bowandag stāyīdan ud wēnišnīg rōšnān az-iz abar nigerišnīh ī daštān ud wattarān pahrēxtan ud hu-niyāyišnīhā wehān frāz awišān dīd<an>.

Page of ed.: 68 
Next part


This text is part of the TITUS edition of Denkard Book 5.

Copyright TITUS Project, Frankfurt a/M, 9.1.2021. No parts of this document may be republished in any form without prior permission by the copyright holder.